एकदा फ़िरायला जाऊन आलं की लगेच परत कुठेही जायचं नाही हा माझा शिरस्ता या खेपेस मात्र मोडला. कोकणात जाऊन आल्यावर लगेचच गोव्याला जायचा योग आला. निमित्त ठरलं ते गोव्यात असणा-या BITS मध्ये असणारा QUARK हा त्यांचा Tech Fest.
गोव्याला जायचं नक्की ठरल्यापासूनच मनात अनेक विचार आणि plans बनायला सुरूवात झालीच होती. त्याबरोबर tech fest ची कामं पण होतीच. ती कामं आणि सगळं आटपत आटपत अखेरीस आमचा चमू मडगावला पोहोचला. आमचा मुक्काम होता तो वास्को शहरात.
पोहोचल्या नंतरचे ३ दिवस पूर्णपणे BITS मध्ये घालवल्या नंतर गोवा दर्शनासाठी आमच्या हातात फ़क्त एकच दिवस होता. त्या एका दिवसात जास्तीत जास्त गोवा बघायचा होता आणि ते पण बाईक्सवर फ़िरून. त्याचं systematic planning आणि बाईक्सची व्यवस्था करण्यात आधीची सगळी संध्याकाळ गेली. नेटवरून maps बघून अखेरीस मार्ग ठरला तो वास्को-कोलवा-वारका-मडगाव-पणजी-दोना पौला-मिरामार-कलंगुट-वास्को असा.
दुस-या दिवशी बाईक्स मिळून निघून GPS वरून रस्ता शोधत कोलवा बीचला पोहोचायलाच आम्हाला जवळपास १०.३० वाजले. कोलवा हा गोव्यातला सर्वात मोठा आणि स्वच्छ बीच आहे. तिथे भरपूर timepass करुन पुढे वारका बीचला जाता जाता १२ वाजून गेले होते. मध्ये रस्ता चुकल्यामुळे थोडा वेळ गेला. पण कुठल्याही परिस्थितीत मडगावला २ च्या आधी पोहोचणं भाग होतं कारण २.३० च्या जनशताब्दी एक्सप्रेसने आमच्यातला एक जण परतीच्या प्रवासाला लागणार होता. त्यामुळे वारका ला फ़ार वेळ न घालवता आम्ही १ वाजता मडगाव गाठलं.
चिन्मयला गाडीत बसवल्यावर आम्ही थेट सुटलो आणि पुढचं destination गाठलं ते दोना पौला. हा पणजीतला अत्यंत नयनरम्य spot आहे. अतिशय स्वच्छ आणि नितळ पाणी, निरभ्र आकाश, उत्तम सूर्यप्रकाश आणि ultimate photogenic views मुळे तिथून पाय निघता निघेना. शेवटी एकदाचे तिथून निघालो कारण पुढचा spot कलंगुट गाठून नंतर पुन्हा वास्कोला पण पोचायचं ना.
कलंगुटला पोचेस्तोवर ५.३० वाजले होते. कलंगुट हा सर्वाधिक विदेशी पर्यटकांनी गजबजलेला बीच आहे. त्यामुळे water sports etc आणि इतर गोष्टी ओघाने आल्याच. काही विशिष्ट angle ने जर फ़ोटो काढला आणि नीट edit केला तर miami चा फ़ोटो म्हणून सहज खपवता येईल इतकी विदेशी पर्यटकांची वर्दळ तिथे असते.
कलंगुट वरून निघेपर्यंत ७.३० वाजले होते. त्यानंतर मात्र कुठेही न थांबता ५५ किलोमीटरचा प्रवास करून पुन्हा वास्कोला यायला ८.३० वाजले आणि आमची एकदिवसीय गोवा सहल संपन्न झाली. एका दिवसांत अंदाजे १७५ किलोमीटरचा प्रवास झाला.
GPS सोबत असल्यामुळे लहान लहान बायपास वरून प्रवास झाला. त्यामुळे खरा निसर्गरम्य गोवा बघायचा योग आला आणि हा प्रवास आणखीनच सुखद झाला. या प्रवासाच्या काही आठवणी टाकत आहे. आपल्या प्रतिक्रियांचे स्वागत आहे..
